Grade 8 Urdu Model Paper 4 – PECTAA Board 2027 | Chapters 13–20

i. جملوں میں استعمال ہونے والے مترادف الفاظ (مثال: خوشی/مسرت) کی مدد سے واضح کریں؟

جواب: مثال: “اس کی کامیابی پر مجھے بہت خوشی ہوئی، اور اس کی مسرت نے میرے دل کو بھی شاد کر دیا۔” اس طرح تکرار سے بچ کر بات کو مؤثر بنایا گیا ہے۔

ii. بدعنوانی کرنے والوں کے ساتھ کیسا سلوک کرنا چاہیے؟

جواب: بدعنوانی کرنے والوں کو عبرت ناک سزا دینی چاہیے۔

iii. فعل کی تعریف ایک جملے میں بیان کریں؟

جواب: فعل وہ لفظ ہے جو کسی جملے میں کام یا عمل کے ہونے کو ظاہر کرتا ہے۔

iv. زبر، زیر اور پیش کو عربی میں کیا کہتے ہیں؟

جواب: زبر، زیر اور پیش کو عربی میں حرکات کہتے ہیں اور ان کے انفرادی نام یہ ہیں: زبر کو عربی میں فتحہ (فتحۃ) کہتے ہیں۔ زیر کو عربی میں کسرہ (کسرۃ) کہتے ہیں۔ پیش کو عربی میں ضمہ (ضمۃ) کہتے ہیں۔

v. فاعل کسے کہتے ہیں؟

جواب: فاعل وہ اسم یا ضمیر ہوتا ہے جو کسی جملے میں کام کرنے والے شخص، چیز یا جگہ کا نام ہوتا ہے۔

vi. کھلی فضا میں ورزش کے دو اہم فائدے بتائیں؟

جواب: یہ ہڈیوں اور پٹھوں کو مضبوط کرتی ہے اور بیماریوں کے خلاف مدافعت بڑھاتی ہے۔

vii. دُور کے سے سے کیا مراد ہے؟

جواب: شاعر کی مراد یہ ہے کہ چاندنی رات میں دریا یا سمندر کے کنارے کھڑے ہو کر دور دور تک نظارہ دیکھیں۔

viii. اللہ تعالیٰ نے انسان کو کس انمول نعمت سے نوازا؟

جواب: اللہ تعالیٰ نے نہ صرف یہ کہ انسان کو لاتعداد نعمتوں سے نوازا ہے بلکہ ان تمام نعمتوں اور احسانات کا شکر ادا کرنے کے لیے عقل و شعور جیسی انمول نعمت بھی عطا کی ہے۔

ix. حکیم محمد سعید کے مشہور ہونے کی ایک وجہ بیان کریں۔

جواب: حکیم محمد سعید کے مشہور ہونے کی ایک وجہ ان کا “ہمدرد نونہال” رسالہ ہے۔

x. درسِ عمل کے کیا معنی ہیں؟

جواب: درسِ عمل سے مراد عمل کرنے کا سبق ہے۔

xi. اندھیرا دور ہونے سے کیا مفہوم نکلتا ہے؟

جواب: اندھیرا دور ہونے سے مراد برائیوں کا دور ہونا ہے۔

xii. بدعنوانی کرنے والوں کے ساتھ کیسا سلوک کرنا چاہیے؟

جواب: بدعنوانی کرنے والے کو عبرت ناک سزا دینی چاہیے۔

xiii. اللہ تعالیٰ نے انسان کو کیا درجہ عطا کیا ہے؟

جواب: اللہ تعالیٰ نے انسان کو اشرف المخلوقات بنا کر زمین پر اُتارا۔

(الف) کرپشن ایک سماجی برائی

جواب: کسی بھی معاشرے کے لیے کرپشن یا بدعنوانی زہرِ قاتل سے کم نہیں۔ بدعنوانی کرنے والے لوگ دوسروں کا حق مارتے ہیں، جس سے معاشرے میں مایوسی، غصہ، انتقام، نفاق اور نفرت جیسے جذبات فروغ پاتے ہیں۔ اس کا نتیجہ یہ نکلتا ہے کہ معاشرہ امن اور ترقی کے بجائے افراتفری، لاقانونیت اور زوال کی جانب سفر کرنے لگتا ہے۔ رشوت، سفارش، ملاوٹ، ناپ تول میں کمی اور اقربا پروری وغیرہ سب کرپشن ہی کی مختلف شکلیں ہیں۔

کرپشن کا لفظ ہر زبان میں معاشرے کے گھناؤنے اور منفی کاموں کے لیے بولا جاتا ہے۔ اگر کسی قوم میں کرپشن سرایت کر جائے تو وہ اپنی شناخت اور ساخت سمیت ہر مقام کھو دیتی ہے۔ کرپشن اعلیٰ اقدار کی دشمن ہے جس سے معاشرہ تباہ ہو جاتا ہے۔ ٹرانسپیرنسی انٹرنیشنل نے متعدد بار اپنی رپورٹوں میں کہا ہے کہ جنوبی ایشیا کا خطہ بدعنوانی کا شکار ہے۔ مالیاتی ہیر پھیر، غبن، دھوکا، فریب، جھوٹ اور بے قاعدگی سے مال بنانا کرپشن کی چند معروف صورتیں ہیں۔

ان کے علاوہ انسان کے اندر دولت کی ہوس اور غصب کا رجحان دراصل ایک فساد ہے جو صرف حرام خوری ہی نہیں بلکہ دیگر برائیوں کا سبب بھی بنتا ہے۔ اسلام بھی کہتا ہے کہ اصلاح کی کوششوں کے بعد فساد نہ پھیلاؤ، یعنی جو اچھائی اور اصلاح پیدا ہو چکی ہے اسے پھر خرابی نہ کرو۔ کرپشن کے خاتمے کے لیے ریاست کو چاہیے کہ شہریوں کو غلط راستے پر جانے سے بچانے کے لیے ان کی بنیادی ضروریات کو پورا کرنے کے لیے اقدامات کرے۔ اگر ایسا نہ ہوگا تو پھر لوگ کرپشن کرتے رہیں گے۔ شہریوں کو تعلیم و تربیت کے ذریعے بھی کرپشن سے دور کیا جا سکتا ہے۔ دینی تعلیمات سے روشناس کروا کر انہیں کرپشن سے دور رکھا جا سکتا ہے۔

(ب) حکیم محمد سعید کا خلاصہ

جواب: حکیم محمد سعید ایک مشہور شخصیت تھے۔ وہ 9 جنوری 1920ء کو ہندوستان کے شہر دہلی میں پیدا ہوئے۔ آپ کے والد نے ایک دواخانہ ہمدرد کے نام سے قائم کر رکھا تھا۔ آپ کی والدہ دین دار اور اصول پسند خاتون تھیں۔ آپ بہن بھائیوں میں سب سے چھوٹے تھے۔ جب آپ ڈھائی برس کے تھے تو آپ کے والد انتقال کر گئے۔ ان کی عمر محض 39 برس تھی۔ والد کے بعد ماں اور بڑے بھائی نے پرورش کی۔ ابتدائی دینی تعلیم کے بعد باقاعدہ تعلیم کا آغاز ہوا۔ آپ نے عربی اور فارسی زبانوں میں مہارت حاصل کی۔ سولہ سال کی عمر میں طب کی تعلیم حاصل کرنے لگ گئے اور جلد ہی بلند پایہ حکیم بن گئے۔

پاکستان معرضِ وجود میں آیا تو آپ سب کچھ چھوڑ کر کراچی آ گئے۔ کراچی میں بڑی مشکل سے گزارا ہونے لگا۔ آپ نے پھر اپنا مطب قائم کر لیا۔ جلد ہی حالات بہتر ہونے لگے۔ آپ نے پہلے ہمدرد دواخانہ اور پھر سکول قائم کیا۔ طب کے فروغ کے لیے طبیہ کالج قائم کیا جس کا افتتاح محترمہ فاطمہ جناح نے کیا۔ اس سے پہلے آپ ہمدرد فاؤنڈیشن بھی قائم کر چکے تھے۔ آپ نے اپنے ادارے سے ہونے والی آمدنی خود پر خرچ کرنے کی بجائے ایک ٹرسٹ کے طور پر خرچ کی۔ آپ بچوں کو اعلیٰ اخلاقی اقدار کا حامل دیکھنا چاہتے تھے۔ اسی لیے آپ نے رسالہ ہمدرد نونہال شائع کیا۔ اس کے علاوہ متعدد سکول قائم کیے جہاں معیاری تعلیم دی جاتی ہے۔ طب کے شعبے میں 200 سے زائد کتب تحریر کیں۔ اس کے علاوہ مذہب، معاشرتی علوم اور سفرناموں پر بھی تحریریں لکھیں۔

آپ سندھ کے گورنر بھی رہے مگر اس دوران نہ تو کبھی تنخواہ لی اور نہ ہی کبھی سرکاری گاڑی استعمال کی۔ ان کی خدمات کے صلے میں حکومتِ پاکستان نے انہیں ستارۂ امتیاز سے بھی نوازا۔ 1998ء میں آپ اپنے مطب سے جا رہے تھے تو چند نامعلوم افراد نے گولیاں مار کر آپ کو شہید کر دیا۔ وہ دنیا سے تو رخصت ہو گئے مگر ان کے منصوبے آج بھی دکھی لوگوں کو فائدہ پہنچا رہے ہیں۔ ہمدرد لیبارٹریز پاکستان کے بانی حکیم محمد سعید شہید نے اردو میں صحت و صفائی پر ایک رسالہ ماہنامہ “ہمدردِ صحت” جب کہ اسلام اور طب پر انگریزی میں رسالے “ہمدرد اسلامکس” اور “ہمدرد میڈیکس” بھی جاری کیے۔ اس کے علاوہ انہوں نے ہفتہ وار رسالہ “ہمدرد خبرنامہ” کے نام سے بھی جاری کیا۔ اردو زبان میں بچوں کے لیے پہلی بار سفرنامے اور ڈائری شائع کی۔ آپ کا ہمدرد نونہال شائع کرنے والا ادارہ آپ کی وفات کے بعد بھی شائع ہوتا رہا ہے۔

آپ ان منصوبوں کے علاوہ انسانی خدمت میں بھی شب و روز مصروف رہے۔ آپ کی فاؤنڈیشن آج تک زلزلہ یا سیلاب زدگان کی مدد اور دیگر فلاحی کاموں میں پیش پیش نظر آتی ہے۔ آپ کی وفات کے بعد سے اب تک فاؤنڈیشن ہر سال ثانوی اور اعلیٰ ثانوی سطح کے ہزاروں ہونہار اور ضرورت مند طلبہ کو حکیم محمد سعید یادگاری وظائف سے نواز رہی ہے۔

جواب: کسی جنگل میں دو بیل رہا کرتے تھے جو بہت طاقتور اور بہادر تھے۔ ہمیشہ مل جل کر رہتے اور ہر خطرے کا مل کر مقابلہ کیا کرتے تھے۔ ایک دن ایک شیر نے ان پر حملہ کر دیا۔ دونوں نے مل کر اس کا مقابلہ کیا اور مار بھگایا۔ ایک دن دونوں باتیں کر رہے تھے کہ اللہ تعالیٰ نے ہمیں سینگوں جیسے اچھے ہتھیار دیے اور ہم نے شیر کو مار بھگایا۔ باتیں کرتے کرتے ایک بیل بولا: “میری طاقت نے شیر کو بھگایا ورنہ تم تو صرف اپنا بچاؤ کر رہے تھے۔” دوسرا چیخ کر بولا: “واہ! اگر میں پھرتی نہ دکھاتا اور سینگوں سے حملہ نہ کرتا تو شیر نے تمہیں مار ہی دیا تھا۔”

دونوں میں تُو تُو مَیں مَیں ہونے لگی اور تکرار اتنی بڑھی کہ دونوں ایک دوسرے سے بیزار ہو کر الگ ہو گئے۔ ایک مشرق کی جانب چلا گیا اور ایک مغرب کی جانب۔ جوں ہی شیر کو بیلوں کی ناانفاقی کی اطلاع ملی تو بہت خوش ہوا اور ان کی تاک میں بیٹھ گیا۔ جوں ہی ایک بیل آیا تو شیر نے چھلانگ لگائی اور ایک ہی وار میں اس کا کام تمام کر دیا۔ جی بھر کر گوشت کھایا اور سو گیا۔ اگلے دن دوسرے بیل کی تلاش میں نکلا اور جلد ہی اسے ڈھونڈ کر اس پر جست لگائی اور ایک ہی وار میں اس کی کمر توڑ دی۔ بیل نے بہت مزاحمت کی لیکن شیر کے سامنے کوئی پیش نہ گئی۔ شیر نے مزے سے اس کا گوشت کھایا اور ڈکار لیتا ہوا اپنی کچھار کی جانب چل دیا۔

(الف) قائداعظم محمد علی جناحؒ

جواب: قائداعظمؒ 25 دسمبر 1876ء کو کراچی میں پیدا ہوئے۔ آپ کے والد کا نام جناح پونجا تھا جو تاجر تھے۔ آپ کا اصل نام محمد علی جناح تھا۔ آپ بچپن ہی سے بہت ذہین تھے۔ آپ نے اپنی ابتدائی تعلیم کراچی ہی میں حاصل کی۔ آپ نے سولہ سال کی عمر میں مشن ہائی سکول سے میٹرک کا امتحان پاس کیا۔ ابتدائی تعلیم حاصل کرنے کے بعد آپ اعلیٰ تعلیم کے لیے انگلستان چلے گئے جہاں آپ نے بیرسٹری کے امتحان میں نمایاں کامیابی حاصل کی۔ آپ ہندوستان واپس آ کر وکالت کرنے لگے۔

اس دوران آپ کے والد کے کاروباری حالات خراب ہو گئے جس کی وجہ سے آپ کراچی سے بمبئی روانہ ہو گئے۔ کچھ عرصے میں آپ ایک کامیاب وکیل مشہور ہو گئے اور آپ کی مالی حالت اچھی ہونے لگی۔ اسی دوران آپ نے وکالت کے ساتھ سیاست میں بھی حصہ لینا شروع کر دیا۔ آپ 1906ء میں ہندوؤں اور مسلمانوں کی مشترکہ جماعت کانگرس میں شامل ہو گئے۔ 1913ء میں قائداعظمؒ نے مسلم لیگ میں شمولیت اختیار کر لی اور تمام مسلمانوں کو اس پلیٹ فارم پر اکٹھا کرنے کی کوششیں شروع کر دیں۔ آپ نے مسلمانوں کے لیے ایک الگ وطن کے لیے تحریک شروع کر دی جو جلد ہی تحریکِ آزادی کے نام سے مشہور ہو گئی۔

آپ نے مسلمانوں کو انگریزوں کی غلامی سے نجات دلانے کے لیے دن رات کام کیا۔ آپ نے انگریزوں اور ہندوؤں کا ہر محاذ پر ڈٹ کر مقابلہ کیا۔ آپ کی انتھک کوششوں سے انگریز آپ کا آزاد وطن کا مطالبہ ماننے پر مجبور ہو گئے اور بالآخر 14 اگست 1947ء کو پاکستان ایک آزاد وطن کی حیثیت سے دنیا کے نقشے پر ابھرا۔ قیامِ پاکستان کے بعد آپ کو پاکستان کے پہلے گورنر جنرل کی حیثیت سے تعینات کیا گیا۔ تحریکِ آزادی میں کام کی زیادتی کی وجہ سے آپ ٹی بی کی بیماری کا شکار ہو گئے۔ ڈاکٹروں نے آپ کو آرام کے لیے کہا لیکن آپ نے اپنے مقصد کے حصول کے لیے اپنی بیماری کی بھی پروا نہیں کی۔ آپ 11 ستمبر 1948ء کو وفات پا گئے۔ (اِنَّا لِلّٰہِ وَاِنَّـآ اِلَیْہِ رٰجِعُوْنَ) آپ کا مزار کراچی میں واقع ہے۔

ملّت کا پاسباں ہے محمد علی جناحؒ
ملّت ہے جسم اور جاں ہے محمد علی جناحؒ

(ب) ورزش کے فائدے

جواب: صحت مند انسان صحت مند معاشرے کی علامت ہوتا ہے۔ جس طرح ایک مشین کا دارومدار اس کی مناسب صفائی پر ہے اسی طرح ایک انسان کی صحت کا دارومدار ورزش پر ہے۔ جس طرح مشین کو چلنے کے لیے تیل اور گریس کی ضرورت ہوتی ہے اور اس کی وجہ سے اس کے پرزے ٹھیک کام کرتے ہیں بالکل اسی طرح انسان کے اعضا کی خوراک ورزش ہے۔

ورزش کرنے کے کئی مختلف طریقے ہیں، مثال کے طور پر سویرے سیر کرنا، دوڑ لگانا، کشتی رانی، سائیکلنگ اور گھڑ سواری وغیرہ۔ ورزش کے لیے صبح اور شام کا وقت نہایت مناسب ہے اور تازہ ہوا میں کی جائے تو بہتر ہے۔ اسی طرح ورزش کے لیے میدان، پارک اور گھاس ہو تو اور بھی مناسب ہے۔ سردی کے موسم میں بند کمرے سے نکل کر کھلی ہوا میں جانا چاہیے۔ کھانا کھانے کے فوراً بعد ورزش نہیں کرنی چاہیے اور ورزش کے فوراً بعد نہانا بھی نہیں چاہیے۔ ورزش میں باقاعدگی ہونی چاہیے۔ کبھی کبھی ورزش کرنے کا کوئی فائدہ نہیں ہے۔ ورزش نہ کرنے سے کاہلی اور سستی آ جاتی ہے۔

ورزش کرنے سے جسم مضبوط ہوتا ہے، جسم کی خوبصورتی بڑھتی ہے، بدن چست رہتا ہے، خوراک جلد ہضم ہوتی ہے، خون کی گردش میں روانی آتی ہے، ذہن تر و تازہ رہتا ہے اور انسان کا سارا دن اچھا گزرتا ہے۔ ورزش نہ کرنے والے افراد کی صحت ہمیشہ خراب رہتی ہے اور بہت جلد وہ لوگ بوڑھے نظر آنے لگتے ہیں۔ ان کی طبیعت میں سستی رہتی ہے اور عام طور پر ایسے لوگ جسمانی اور ذہنی طور پر کمزور رہتے ہیں۔ اگر ہم روزانہ ورزش کریں تو ہم چاق و چوبند رہ سکتے ہیں۔